江若琳瞓到半夜遭爆格

江若琳瞓到半夜遭爆格
http://the-sun.on.cc/cnt/entertainment/20111230/00470_001.html

密密到內地工作吸金的江若琳（Elanne），日前在敦煌拍劇時遇上酒店驚魂！有夜行賊趁她和女助手熟睡時，潛入酒店房偷走二千元，瞓醒才知驚的Elanne回想遭夜行賊「光顧」，感到十分恐怖！
不少藝人近年到內地掘金，雖然「人仔」好賺，但他們在內地開工時，無可避免要在當地酒店下榻休息，更經常遇到「奇事」，甚至爆出酒店驚魂，嚇到有得震冇得瞓！近年工作不斷的江若琳（Elanne），今年主攻內地市場，一劇接一劇，人氣及「人仔」齊齊急升，不過近日她卻於半夜被爆竊！
偷晒啲錢
事緣日前Elanne在敦煌為《巾幗大將軍》開工，拍攝完後，她與助手返回劇組安排的酒店套房孖鋪休息，瞓到半夜，兩人都聽到客廳有怪聲，但由於疲憊不堪，加上又誤以為同床的「另一半」起床行出廳，故未有多加理會繼續瞓！豈料好戲在後頭，翌晨起床後，她們才驚覺放在客廳的兩個手袋全被摷亂，手袋內的銀包被打開，銀包內的錢悉數被偷走，幸好其他物品沒有被偷去，不過已令Elanne和助手嚇到飛起，她們即時通知劇組，眼見酒店房內的門窗沒有被撬過的痕迹，因而估計賊匪是使用電腦門匙潛入酒店房偷錢！
大嗌恐怖
嚇餐飽的Elanne事後接受訪問時，仍猶有餘悸，雖然只是損失二千元現金，惟對於夜半有賊光顧仍感到恐怖，她說：「我同助手聽到客廳有聲，但因為太同以為係對方行出廳，所以大家都冇理到，亦冇去開房門睇，如果我哋當時開咗房門，而畀個賊仔知道得我同助手兩個女仔喺房度，都唔知會發生乜事。」雖然飽吃驚風散，但她仍要為《巾》劇趕工，事發後已離開敦煌，跟大隊到象山繼續拍攝，事件則交由劇組處理。