謝安琪掟300萬贖身

謝安琪掟300萬贖身
http://the-sun.on.cc/cnt/entertainment/20120112/00470_001.html

明日紅館開騷的謝安琪，跟所屬環球唱片的關係愈鬧愈僵，據知其經理人夏森美準備掟300萬元向環球買斷餘下的三年合約，隨時執包袱蟬過別枝！
自經理人夏森美與環球高級副總裁黃劍濤（Duncan）交惡後，謝安琪（Kay）在環球的日子愈來愈難捱！環球兩年前以500萬元簽下Kay唱片合約五年，一直是公司的賺錢機器，可惜夏森美為了保護她，導致跟傳媒關係惡劣，加上不時就Kay的上榜位置及宣傳等問題產生拗撬，令雙方分歧日增！

去年，環球轉而投放極大資源簽下吳雨霏，有感Kay的「環球一姐」地位逐步受威脅，當時有人向環球高層施壓！另又有傳版稅問題時公司讓她現身亞視而得罪無綫，至今仍影響曝光率，令雙方關係急轉直下！Duncan曾言明若關係進一步惡化，不排除與大老闆洽談Kay的前途問題。

如今與環球交惡，Kay為了事業能更上一層樓，據知她即使近日忙於紅館個唱，但同時亦密謀在演唱會前夕向唱片公司提出解約方案！她打算以餘下三年合約的300萬元價錢，向環球買斷合約「贖身」，待個唱完畢後便會坐低傾妥解決方案。據悉，Neway與星煥等多家唱片公司最近對Kay虎視眈眈，有意把她收歸旗下。
承認多人斟
記者昨日就此致電夏森美求證，提到用300萬元買斷合約一事，他承認與環球關係確實出現問題：「係！同環球喺合約問題上有分歧，依家雙方處理緊，其他嘢真係唔方便講，完騷後會再處理，會同環球好好咁傾，如果真係解決唔到，唔排除考慮下一步點做！」提到有傳Kay向其他唱片公司叩門，夏森美極力否認：「反而係主動同我接觸搵Kay，真係好多謝對佢嘅重視，但佢依家同環球仲有約，尊重合約精神！」環球方面直至截稿前仍未有回覆。