|
|
餓男扮林峯陪盛女團年
盛女愈來愈多，近年內地興起「出租男友」減輕家人催婚壓力，這股風氣更殺入香港。臨近歲晚，有港男看準市場需求，出租自己為盛女提供團年飯見家長服務。「出租男友」價錢豐儉由人，兩小時飯局由一百元至五千元不等，更有港男提出免費「交換出租」。記者甫在討論區張貼「誠徵出租男友」貼文，隨即有數位港男報名並附上照片，殷勤程度爆燈。最後記者接觸了三個「出租男友」，發現他們各懷目的，盛女滿心以為租個男友便能紓緩催婚壓力，但破財之餘更分分鐘引狼入室！脹爆林峯 想溝女多過賺錢
二十八歲的「出租男友」阿臣（化名），傳給記者的照片英俊不凡，擺出一副「chok樣」，和林峯有幾分相似；然而真人與照片大相逕庭，身形較照片脹足幾個碼。見面時，他見記者露出愕然神情，似怕記者打退堂鼓，急急轉軚說：「我本身想收二百蚊，但其實唔收錢都得，不過你要扮番我女朋友，陪我同屋企人食飯。」
記者不明白阿臣的動機，他解釋：「我未拍過拖，屋企人成日叫我帶女朋友返去，有時仲追問我幾時結婚，我都唔知點答，一直拖到依家。」做文員的阿臣，最初面對記者時十分怕醜，只是低頭微笑，然而他愈說愈興奮，更說到「指手畫腳」。最後更承認做出租男友並不為錢，只希望藉此機會「識女仔」。見面後他不斷傳來多個短訊和來電，希望與記者交個朋友，「溝通」一下，似想追女仔多過賺錢。
翻版林敏驄 掃女記者試手感
出租男友Jay（化名）傳給記者的照片高大威猛，表情趣怪，貌似藝人張繼聰，但真人竟是一名年近半百的「翻版林敏驄」，滿面鬚根，身高不足一米六！記者投訴貨不對辦，他表示：「張相係之前影落，呢排殘咗啲，但我真係三十七歲o架！」他開價一餐團年飯兩個鐘收費五百元，期間會提供拖手、攬腰，甚至「錫面珠」等服務。
Jay自稱任職酒吧，無做過出租男友，卻是「熟手技工」：「試過幫幾個女性朋友扮見家長食飯，又試過去陪佢哋啲朋友落吧、激番前男友咁，當然有錢收就最好啦！」他為顯示自己「專業」，不停起記者底：「萬一你屋企人問起，我都識答嘛！最好夾定口供，佢哋一定唔會懷疑！」他還叫記者「攞隻手嚟」，笑笑口說：「試吓手感先嘛，唔係好易穿煲o架！」又有意無意輕掃記者手背，表現猴擒。
騎呢社工 「為了解社會狀況」
除了賺錢及識女仔，港男做出租男友原來更有「另類」理由。二十六歲的阿權（化名），見面當天穿着運動服、孭背囊，相貌十分年輕，看上去像個學生，而且言行舉止斯文有禮，與相片比較，算是最對辦的一個。他聲稱曾任職社工三年，現時已離職，但仍希望對社會現狀有更深入探討，「為了解社會狀況」而出租自己。
「有啲女仔到咗適婚年齡都識唔到男朋友，被屋企人催婚，我好想了解吓呢個社會狀況，加上我依家失業，好得閒，咪當幫吓人囉！我之前未做過（出租男友）o架！」阿權自稱數月前和女朋友分手後，就再沒有拍拖。雖然說做出租男友是為了幫人，但阿權卻要收取一百元出租費用，而傾談片刻後，已露出不耐煩表情。見面後答應出租的阿權，最後更「人間蒸發」，記者致電他亦再沒有回覆。
脹爆林峯
年齡：28歲
身高：約1.7米
型仔變「林敏驄」
年齡：37歲
身高：約1.6米
過氣社工
年齡：26歲
身高：約1.75米 |
|
發表於 2013-2-8 07:41
| 
