掩耳盜鈴: 通識教科書河蟹咗 封殺丐幫 河蟹, 高中

Lik

From Fruit Daily, 2010-08-17


課文介紹主要政黨，獨缺社民連。


書本形容區議會方案較具「民選」意義，講法真係見仁見智。


呢幅長毛圖畫，形神俱無。

高中新學制實行咗好幾年，通識教育科必定提到政黨、選舉等政治議題，但係學生如果單純靠呢啲教科書去理解本港政治環境，有可能被誤導。八方發現有啲教科書疑似河蟹咗，介紹本港主要政治團體時，立法會佔三席嘅社民連被封殺，反而只有一席嘅民協同街工卻上榜。

介紹政黨唔提社民連

朗文最新版初中通識科《法治和社會政治參與》教科書，入面有章節介紹本港主要政黨，不過只列出民主黨、民建聯、自由黨、公民黨同民協五個政黨，有人同八方講，點計有三個議員嘅社民連都算係主要政黨之一，教科書有乜理由當佢透明！

呢本初中教科書有民建聯、公民黨議員相片，偏偏冇社民連議員，只有一幅長毛喺立法會舉手發言嘅漫畫，呢個微妙編排，會唔會係巧合呢？而另一本齡記出版嘅通識教科書，就列出六個主要政黨，除上述五個黨，加多一個街工，社民連固然冇份，連香港最大工會工聯會竟然都隻字不提，好多人看在眼裏，可能覺得政治不正確。

社民連黃毓民話教科書封殺社民連只是掩耳盜鈴，該黨論知名度冇可能低過一人政黨，「我哋好多初中生擁躉，書本唔提，佢哋都會搵我哋」。

教科書河蟹咗，好多網民睇唔順眼作出猛烈抨擊，質疑出版社係蓄意誤導為初中生洗腦，免得中學生上街公投。朗文本教科書內容又快又新，已經提到通過冇耐個區議會方案，指 2012立法會選舉新增五席區議會功能組別，由全港逾 300萬選民選出，係較具「民選」意義。

呢個說法，同政府講法不謀而合，通識教育教師聯會主席張銳輝就話，教科書出版社一提到社會議題或者敏感事件，實會有取捨、有立場，好似講六四事件，各自都有唔同演繹，因此教師最好只視為參考，唔一定要灌輸晒教科書所講嘅觀點畀學生，因為好多社會議題都冇標準答案。張 Sir又話，其實老師可以隨機應變，提出點解有啲出版社唔提某政黨，從而引發學生討論，既然教育局冇強制通識科用書，老師大可自備教材，效果可能更好。

Lik

粉腸，唔該你去香港買本朗文通識科《法治和社會政治參與》嘅教科書返來先至同我講啦～

-力