To Nam小姐：吳藹儀議員話哀莫大於心死！

小姐

記得早兩日 Nam小姐問我與其成日鬧中共同特衰政府，不如諗吓可以做啲乜野去令情況改善。當我食lunch睇呢條片睇到 4:48果陣時，我特然諗起 Nam小姐嘅呢一問。

如果你無跟開呢條新聞嘅話，個 background 係，特衰政府為咗要杜絕立法會議員往後借辭職而引發公投，於是就哪哪聲亂咁修例，要令到以後再有議員辭職嘅話，就唔再補選，而係就咁直接俾得票第二高嘅參選人去做。其中方案除咗千瘡百孔、道理不通之外，最重要就係佢咁做其實係藐視緊民意，剝削緊選民嘅投票權。但因為特衰政府用行政手段來做呢件事，所以唔單只可以避過響立法會被民主派人士否決嘅可能性，而且佢仲響保皇派嘅護航之下一定可以通過條例修改。

Nam小姐，我想同你講嘅就係，響今時今日嘅香港，無論係議會內外都好，其實你再講乜野道理都已經無乜用、無意義。我地唯一剩低可以做到嘅就係，去盡我地嘅能力，去講俾一啲有心嘅市民聽，佢地點樣俾當權者剝削、搵笨柒。同時，佢地亦要點樣企出來，用最後嘅一招--群眾壓力--去維護自己嘅權益。

-力