哪，唔好成日話我淨係對中國大陸有彈無讚。無錯，大陸嘅工業污染的確十分嚴重（響某啲地方甚至係嚴峻），但除咗我地 Peter仔一定會講嘅錢多之外，中國響環保方面亦真係有一樣野比西方國家來得積極：呢個就係投放響 alternative energy 方面嘅 R＆D。當然，中國全國四周圍都有煤，所以暫時來講煤始終係最主要嘅發電燃料，但同時，佢對水力、風力、太陽能、同其他低污染嘅能源等等嘅都投放咗好多唔同嘅資源去發展。水壩雖然嚴重影響生態環境，而好多時興建亦勞民傷財，但長達計都應該好過繼續用煤。而早排中國亦頗為高姿態咁簽咗西方（唔記得係北美定歐洲）嘅太陽能公司去搞太陽能發電。國內嘅電動單車四周圍都可見，而混能汽車同電車 (electric vehicle) 嘅研發亦拍得住日本以外嘅西方國家。
而最重要嘅係，中國因為國內人口極為龐大，除咗最低級果啲地方領導人之外，其實其他各級領導人亦深明中國嘅持續經濟發展唔可以好似西方社會咁靠石油來帶動，因為就算崛晒全世界啲油出來，根本都唔會夠十三四五六億人用，而且世界各國亦唔會咁便宜中國。所以對於能源方面嘅需求，一方面要繼續 secure 石油來源，而另一方面亦要不停發展新能源方向先至能夠滿足未來嘅需求。反觀歐美等國家就因為 Big Oil 老早就坐大咗，貴為既得利益者，佢地根本唔會全心全力想歐美國家大量減低對石油嘅需要。
發表於 2009-10-26 14:46
| 
