|
|
Good evening everybody~
好耐無用大C姐呢個朵﹐有D唔關。
終於可以放暑假﹐出完一個trip﹐應該有幾個月留喺Vancouver﹐可以同各位蛋散say個hi。其實有D嘢好想講﹐事源最近出trip撞翻個朋友﹐呢個朋友有"過氣高掙鞋女王"之稱。
聽呢個名已經如雷灌耳﹐知道佢好唔少嘢啦。確之然呢個朋友係好鍾意買嘢﹐見到D手袋係真係個個都覺得靚﹐個個都想買。但係其實買完係咪真係好鍾意﹐又未必啵。今次見面緊係shopping啦﹐佢竟然忍到手唔買袋﹐我都好好奇。原來佢今年人工減左一截﹐差唔多一半。當然﹐對於好多香港人嚟講已經算好唔錯﹐但係而家佢同朋友租緊半山﹐又做開指甲﹐的士出入就唔少得啦﹐當然支出不少。
所以最近呢位朋友都無咁闊綽﹐盡量唔買貴嘢。當然去到LA依然買左對Jimmy Choo高掙鞋﹐但係比起一個袋﹐已經係算平﹗佢同我一齊去shopping見我無咩買嘢﹐好奇問我﹐"你點解咁忍得手? 以前都見你買一個二個手袋面不改容﹐以家你好似無咩買嘢﹐你近排都唔惦呀?"
呢個問題突然hit中我﹐令我都諗一諗﹐從邊年邊月邊日開始﹐我大C姐無再喪買名牌? 其實我收入今年係多左﹐所以唔係買唔起﹐但係眼見一個二個呢D所謂名牌袋真係其實差唔多款。好多時一見到個袋﹐你已經知你用兩次已經會悶。幾靚都好﹐絕大部份嘅袋係真係極唔襟睇。同埋我其實在諗深D﹐我係覺得人真係大個左﹐自信心多左所以唔洗靠幾萬蚊一個袋去話俾人聽我有消費能力。老實講﹐今時今日咩個名牌已經唔係身份特徵或者代表你有品味。
之後我個朋友都有駁我﹐話"車~ 你一身都係名牌啦﹐萬幾蚊件褸都係咁買。你扮咩洗盡沿華唧﹗" 呢個又唔同啵﹐衫呢家嘢係好個人。我又唔係一定要明牌﹐但係我鍾意﹐又襟睇襟著的話﹐我會好捨得買囉。好多人都成日問我點著衫﹐我都唔知點答。好多人著衫﹐或者打扮﹐都無個人風格。你見人著你又著﹐見D靚妹仔著咩你一把年紀又去跟。當然﹐有好多人都可能識著得好decent﹐好大方﹐但係可能又無個人特色。所以呢﹐著衫打扮呢D係好主觀﹐你又要好有guts去堅持你個look。你著得三五七年﹐就會變做個人風格架啦。
即係好似D人扮高貴走去整gel甲。以為整完好有品味﹐周位問人"呢個款靚唔靚呀? 呢隻色新架﹗" 恕我直言﹐整呢D厚笛笛嘅gel甲只係有兩種人﹐一種係食飽飯無嘢做嘅C9﹐另一種係無內涵無其他興趣嘅靚妹OL﹐日日返工都係講是非講劇集講明星講化妝。你幾時見過高貴嘅Chanel廣告裡面個model會整閃石花花立體gel甲?? 你真係要好無聊好無聊先可以忍受兩個禮拜徙幾個鐘去整手甲﹐又要好得閒每次去諗要整咩款貼咩閃石油咩色為求每次唔同之後去煩D男友"我D手甲腳甲靚唔靚呀? 岩岩整架﹗靚咩唧﹐你都睇唔到﹐你覺得上次個色靚D定係今次唧? 我親翻件衫架﹗你望真D﹗"
每次我見到呢D女﹐我都想代佢哋D男友一腳伸埋去。
-- 時裝界響噹噹紅人大C姐 |
|
發表於 2009-7-15 22:28
| 
