|
|
上回講到香港人市賄心態同行為﹐其實已經想講呢個topic不過唔想off topic所以想另外開一個題。
話說大C姐個家族都OK大﹐大C母同大C父兩邊都有好多好多親戚。亦因為咁﹐所以我有好多呢裡故事可以分享。從小到大﹐我都好知道大C姐屋企係比上不足比下有餘嘅小康之家。因為確實細細個果陣﹐每年拜年就好feel到自己屋企個status。小朋友有時可能唔知屋企其實有無錢(可能以家D細佬早熟會知啦)﹐我係無咩概念﹐我會覺得所有人都係咁上下架啦。但係每次要去一D"屋邨"去拜年就知出事。小朋友嘅大C姐係唔識扮嘢﹐一知道要去某D親戚屋企拜年就十萬個唔願意。首先﹐我唔係歧視屋邨﹐但係以前D舊屋邨D衛生環景的確好差。而且我記得通常都幾隔涉﹐泊車要泊到好遠﹐去到又要揾一大輪兜幾個圈(證明根本好少去)﹐去到都仲要撐幾層樓梯... 小朋友係唔識講大話﹐你問我鍾唔鍾意去﹐我以家都好勉強﹐莫講話細個。大C姐從小到大都唔係好鍾意逗利是﹐一來我覺得要好厚面皮先可以走去一D唔係好熟嘅親戚或者街坊講句"恭喜發財"﹐我從來都唔係好願做呢個動作﹐而且無功不受祿﹐無啦啦收人錢好似好貪心咁。二來我不嬲都唔keep自己D利是錢﹐都係俾大C母儲起。所以逗多逗少都對我無咩影嚮。
死啦﹐好多題外話添。講起窮親戚﹐我不得不題我十多歲返我婆婆鄉下嘅一個經歷。其實大陸呢D親戚算唔算窮呢﹐我都真係唔知。因為當地嚟講﹐我婆婆果邊D親戚已經係算中上。但係相比香港生活質素﹐當然係有好__大嘅距離啦。我一到步﹐就見都有個小朋友著住一件我多年前丟左嘅校服(仲有個校章)﹐原來我婆婆連埋D舊衫囉左上去。D小朋友對我當然好好奇啦﹐連我部discman嘅電芯都囉左去玩一大輪。我諗當時呢D小朋友仲未識咩係discman啦。到食飯啦﹐當然有朋自遠方來就緊係大排延席啦。但係好對唔住﹐當年大C姐確實食唔落。一來好多油﹐豬肉D肥糕我都唔知點夾走﹐又驚住吐出嚟失禮(顯然佢哋係當寶﹐唔肥唔食)。二來D杯杯碟碟又唔係好乾淨啦(呢個係好主要原因)﹐我一坐落就有一個三表叔定四舅公開罐"可樂"俾我啦。我頭頭都諗"今次無死啦﹐有杯可樂都頂到吓"。點知杯可樂唔凍都不特止﹐個杯係有茶積﹐同埋係飲落唔似可樂味。講到呢度﹐大家都想像到大概個情況係點﹐我都唔想講我當晚點樣企喺一個膠桶裡面沖涼嘅情形。之後仲俾我聽到我婆婆鬧個親戚唔好咁慳﹐用咁少洗潔精﹐D嘢洗得唔乾淨等等。可想以知﹐當時大C姐不禁係O左嘴。
果晚臨入房訓﹐果個好慳嘅親戚(我唔記得應該點叫佢﹐就當係襟婆先啦)突然走埋嚟﹐細細聲講"我無咩招呼你呀﹐你自己囉去買嘢食啦"同時間塞左一百蚊人民幣俾我。我都嚟唔切反應就講早抖行左去。果晚仲特登安排我訓唯一一間有冷氣嘅房俾我。果晚我完全訓唔著﹐訓唔到原因唔係因為張床硬同D枕頭有味﹐而係我真係攝高左個枕頭眼泛淚光好自責。因為我知道呢D親戚已經俾晒佢哋最好嘅嘢嚟招呼我。然而我一到步直至入房果一刻我諗我都係全程O嘴同歪面。我當一刻諗﹐其實我心裡面果種對所有嘢不悅嘅感覺其實D大陸親戚可能都feel到。我果刻好深深被一張一百蚊紙感動。
之後個trip都唔想多講。個心一放開﹐其實知道人哋個生活方式係咁佢哋樂在其中﹐根本唔洗你去藐嘴藐舌。而且呢班親戚生活好簡單﹐最後一晚同佢哋已經打成一片。仲跟佢哋坐喺一條新起未通車嘅大街﹐望住一棟岩岩起好嘅公安廳﹐連埋其他村裡面嘅人一共廾幾三十人﹐對佢哋嚟講已經係一個娛樂。
亦深深體會到﹐快樂其實可以好簡單。我再諗翻起香港住屋邨D親戚也好﹐大陸D親戚也好﹐每一次見到佢哋﹐縱然我心底係十萬個不願意﹐佢哋永遠都會笑到見牙唔見眼﹐好真心去歡迎探佢哋嘅人。呢一種真誠反而喺好多所謂有錢親戚嘅嘴臉揾唔到。
轉個頭先再講有錢親戚...
at17 窮得只有愛
-- 不懼素顏大C姐 |
|
發表於 2010-8-15 00:43
| 
