本帖最後由 ayako 於 2012-9-28 12:45 編輯
係呢個世界放棄左我, 定係我放棄左呢個世界?
1984年, 4歲.
住o係隔離既仁哥玩火,
唔小心燒著左李嬸放o係門口既垃圾,
李嬸梗係激氣啦.
仁哥搵我頂包, 佢話以後每日都會請我食糖喎.
我拒絕左, 結果佢阿媽打左佢一身, 佢就打左我一身.
1988年, 8歲.
我知道有幾個同學潛入教員室, 偷試卷.
所以, o係考試之前, 我告比老師知.
經校方追查之下, 捉到果幾位同學, 記左佢地大過.
不過, 班上面既其他同學, 竟然話係我唔o岩,
佢地話, 係我令佢地錯失偷睇題目既機會.
結果, 之後讀小學果幾年, 我就被孤立, 無人同我做朋友.
1992年, 12歲.
我媽想我升中讀名校, 因為佢個廿幾年姊妹係副校長喎.
所以如果靠人事, 去面試既話, 應該一定收我.
但係, 我一d都唔想讀果間中學, 因為聽人講, 讀名校好辛苦架.
我媽當然點都想我入到啦, 所以逼我放暑假都要補習.
我無辦法之下, 唯有面試果陣hea 左佢算數啦.
後來, 我媽知道左, 好大力咁打左我一巴,
但係唔知點解, 果個咁既副校長, 竟然最後都係收左我.
1995年, 15歲.
我鍾意左女班長慧芳, 果陣坐我隔離既老死強仔話過會幫我.
因為佢話佢小學已經識得慧芳, 好了解佢咁話.
就o係Christmas Party果晚, 強仔細細聲話我知,
慧芳對我都有好感, 仲叫我向佢示愛.
於是, 我果晚就點左首lum歌比慧芳, 當然仲加左幾句情深對白啦.
點知, 原來慧芳對我根本就一d 野都無既, 我仲好記得,
佢黑晒面咁走來同我講, 話我令佢好無面喎.
一個月後, 慧芳就同強仔開始拍拖, 咁我明晒成件事啦....
1999年, 19歲.
記得果年, 我同另外兩位同學, 爭做學生會會長.
佢兩個都係有錢仔來架, 所以佢地用錢, 收買人心, 叫人投佢地票.
我向學校方面反映過架, 但係校長話, 佢地無犯規喎.
咁既話, 我梗係輸啦, 贏左果位同學, 好寸咁同我講:
"政治係有錢人玩架, 學下野啦, o靚仔!"
2002年, 22歲.
當時入左傳理系, 志願係想做個為民請命既記者.
隨住爸爸過左身, 屋企變得越來越窮,
我只好應承幫同學做槍手, 同佢地寫paper賺錢.
正所謂上得山多終遇虎, 終於有一次,
比professor 捉到, 睇得出我同另一位同學篇文好似,
捉我地去問, 果位同學梗係死口唔認啦,
但我為左生意, 我只好話係我抄佢,
跟住, 我就被記過, 仲要repeat 果科添....
2006年, 26歲.
o係報館做左三年, 一直都無機會上位, 為左前途, 我轉工去做雜誌社.
果間雜誌社, 專做揭人私隱既八掛新聞既, 我就負責政治新聞版,
成日都要派狗仔隊跟政界人物.
有一次, 我收到一個高官同地產商涉及以權謀私既資料,
我無將呢單料報比老細, 反而搵左果位議員同地產商講數,
最後, d 料比返佢地, 我就收左好大筆錢,
同埋以後有關政府既獨家消息.
2010年, 30歲.
o係雜誌社已經做到上主編, 雜誌o係四年間銷量增長八成.
我主力將本雜誌做更多既娛樂新聞, 請更加多既狗仔隊.
為左好賣d, 我逼每個員工, 唔理點都好啦, 每期都一定要爆幾單醜聞.
矛盾既係, o係呢個時候, 我竟然娶左個明星做老婆, 仲要好高調咁搞結婚.
當然, 呢個婚禮, 自然成為左我本雜誌既獨家新聞啦...
2015年, 35歲.
我老婆個圈中好友同佢老公鬧離婚,
我hack 入我老婆電腦, 偷左佢同佢個friend 既email.
咁, 就做左我雜誌果星期既封面故事.
點知, 幾個月後, 到我老婆同我離婚.
2020年, 40歲.
雜誌牽涉一宗發放虛假報導同誹謗既官司,
告我果個係本地首富個仔.
結果, 雜誌社敗訴, 賠錢賠左成千萬,
我亦被革職.
2021年, 41歲.
失業一年, 我搵到間報館仔做下打雜.
2022年, 42歲.
再因為我d 專業操守有問題, 再一次被革職.
2025年, 45歲.
我證實生cancer.
訓o係病床上, 接受緊一位記者訪問.
佢問, 我曾經係叱吒傳媒既風雲人物,
有無後悔行錯路? 我無答佢, 只係合埋雙眼.
2026年, 46歲.
死亡? 定係, 我根本一早已經唔存在o係呢個世界上? |
發表於 2012-9-28 12:20
| 
