獨男宅女的故事 - 邊個單位要付最大責任?

故事

大家好﹐上個禮拜大家討論97後香港12年大劫討輪得如火如茶﹐所以我就postpone左呢個題。其實呢個都唔係咩新topic﹐但係好多人都會問大C姐對獨男/宅女有咩意見。首先﹐早喺10幾年前﹐大C姐身邊已經有呢類人﹐只不過係無一個形容詞﹐亦都無人囉出嚟講。所以我都唔知係唔係近年真係多左呢D個案﹐定係傳媒古老當時興去煲大件事。

我先講我一D老表嘅故事。我有一個老表叫阿培﹐好細個讀書時期已經令屋企人好頭痛。唔知係咪同佢父母離婚有關﹐阿培讀書一直係時好時壞。一時聽佢阿媽話阿培考頭五名﹐但係第二年又話唔合格﹐要求學校俾佢升班等等。阿培個個性又係有D古怪﹐成日做D出人意表嘅行為﹐而且唔多出聲又無咩反應﹐所以係無朋友亦唔出街。佢阿媽已經一直從小到大都幫佢報好多好多興趣班﹐希望阿培有一樣嘢做得成功﹐會有多D自信心。佢阿媽同後父亦都算係幾火爆﹐好多時見到阿培都唔知鬧好定打好。其實鄰居都試過報警投訴佢哋打仔﹐但係都無辦法﹐因為實在唔知點樣去教。之後個阿媽同個後父就生多個仔添﹐即係阿培就多個細佬(俊俊)。好奇怪﹐其實阿培好錫個細佬﹐個細佬都好跟佢。雖然俊俊唔算絕頂聰明﹐但係相比之下﹐當然得人歡心多D啦。所以個後父一直好偏心呢個仔﹐一來係自己骨肉二來俊俊都係一個幾正常易教嘅細路。

好啦﹐唔知F.5定中F.7之後阿培當然上唔到大學啦﹐之後父母更加頭痛﹐因為以阿培個性格莫講話見唔見得成工﹐可能直頭揾都唔會去揾。但係又好好彩阿培個阿媽又幫佢揾到一份鐘錶行嘅工做徒弟之類。其實大家當時都鬆一口氣因為都覺得好適合一個半自閉嘅人做。但係好衰唔衰﹐連個老闆都頂佢唔順﹐本來諗住交條鎖匙俾佢開鋪但係阿培竟然唔肯﹐又唔上心﹐唔想進升且如之類。其實多年嚟都一直有好多問題同故事﹐而且近年大C姐都好少再同呢家人見面所而都唔知阿培搞成點。不過大概知道26歲都好似無拍拖亦無咩社交生活。

另外一對老表係兩姊弟﹐暫且叫阿玲同阿傑。阿玲同阿傑都算心智正常﹐其實一D都唔似阿培。但係阿玲同阿傑個阿媽就係典型無打過工﹐一生人唯一責任就係對仔女嘅家庭煮婦。好多人都以為屋企有個家庭煮婦照顧﹐D仔女一定好正常好開心啦。但係其實就係因為太close﹐兩個仔女都無咩私人生活﹐亦唔係好識/唔需要自己照顧自己。另外﹐阿玲同阿傑個老豆係超級大男人﹐其實唔係好鍾意D仔女出嚟打工﹐尤其是個女。但係D仔女讀書亦唔係標柄﹐中學畢業之後一直遊手好閒﹐每日就係同個阿媽喺屋企追劇。但係個老豆其實收入唔多﹐我諗都係頂多兩萬蚊要養起一頭家﹐而且早兩年因為生病所以經濟都唔係好好。可能仔係知道自己就嚟退休﹐個老豆都開始俾D仔女揾工。又因為得知我家姐係某大會計師樓嘅manager就不停問可唔可以介紹入去做個"文員"(典型無打過工﹐日日追劇集以為真係可以靠人事就入到去打工嘅心態)﹐當然呢兩位公子同小姐廾幾雖都無工作經驗﹐中學畢業真係唔知點幫。

呢幾位都係我眼中嘅獨男同宅女﹐可能同大家所諗嘅有D出入但係其實都不外乎幾個關鍵條件﹕欠社交能力﹐缺乏自信﹐唔多出街同社會脫節。只不過呢幾年大家個重點放左落去打機同電腦﹐但係我可以大膽講﹐無PS2同電腦之前已經有呢類人。大家除左投票之外﹐亦可以講吓身邊有無獨男同宅女﹐同埋你心目中獨男同宅女個定義係咩。獨男宅女的故事 - 試舉例及說明之。

-- 健談兼健美嘅C姑娘娘