大C姐夏日清涼爽之孝順父母

老婆

早個幾星期有個poll講家用。我大C姐真係有D嶄愧﹐我自出身到以家都無俾過家用。

我老豆雖然唔係有錢佬﹐但係一定有錢過我。同埋我十幾年都唔係同我老豆住﹐又唔係成日見﹐唔通個個月電匯D錢俾佢咩。當然﹐俾家用對於好多人嚟講﹐都係心意唧。所以我都識做既﹐大數目咪通常我頂囉。所以每年夏天就有一大疊單等我科水。最近個保險又要俾年費﹐又幾千銀。之後我老豆個外傭不嬲係我俾開﹐又係一年俾一次﹐見到張單我不禁又講左個單字。9月我老豆同佢老婆話想去秋季旅行﹐當然緊係想我請佢哋去玩啦。唔洗出聲﹐我就已經話"等我出錢啦"。

一向豪爽嘅C姐其實都算闊佬開﹐但係一個月內洗成萬幾蚊都幾肉赤。尤其今個年頭其實好多身邊朋友股市重創後仲未療傷。好多失業嘅朋友仲做緊D臨事散工﹐希望個市好D先做翻老本行。所以而家洗錢都有D罪惡感。但係見到兩老好心安搞生日﹐搞旅行﹐個心又VO一句"都係錢唧﹐又唔係真係俾唔起﹐洗左咪又再揾過囉﹗"

但係我好想講﹐天下D老豆老母可唔可以唔好咁煩﹐同埋咁八? 事源係﹐每次同我老豆通電話﹐其實講嚟講去都係三幅屁﹐我又唔係要佢entertain我﹐但係永遠講到無嘢好講就囉D姨媽姑姐嘅事嚟講。好樂此不疲咁去gossip親朋戚友嘅事囉。老老實實﹐我係連呢D人咩樣都無咩印象﹐可能十年內都無見過﹐人哋D仔女點衰﹐點唔長進﹐點爛賭﹐其實我唔係好有興趣去知。同埋呢D我始終覺得係D大人嘢﹐作為一個少女﹐我係唔應該加把嘴﹐所以D大人一類堆講完咪算囉﹐話我知做咩呢?

同埋呢﹐我覺得香港人都係有D鍾意用人哋嘅不幸去表現自己嘅幸福囉。我成日同我老豆講﹐唔好咁八啦﹐同埋你唔係有心幫人﹐都唔好周街唱人哋D嘢啦。你講我聽﹐我又無咩得著﹐而且又唔熟﹐又無咩感覺。所以我決定捉我老豆去學電腦﹐學中醫。我希望佢忙D﹐多D世藝﹐多D話題就唔洗八人哋D是非。

-- 又要開始扮窮嘅大C姐

mcjohnjohn

金牌老友 (超級)

Rank: 6 Rank: 6

2^#

發表於 2009-8-2 18:03 | 只看該作者

大C姐, 怨小弟多口八卦...
呢篇文章中, 你只係講"我老豆", 而冇謂過"我老母", 更用"佢老婆"去形容你老豆身邊既另一半. 請問, 你老豆既老婆係唔係你老母?

TOP

blueberry

一般老友 (新手)

Rank: 1

3^#

發表於 2009-8-2 18:31 | 只看該作者

人活到o甘上下年紀﹐已經無「前途」同「夢想」可言﹐仔大女大﹐其實已經無咩可以再做﹐唔可以再好似後生仔o甘話想創業﹐想「第時大個點點點....」﹐對佢地來講﹐將來已經唔再重要﹐所以好多時候都會向後望(過去)或者向旁邊望(身邊的人和事)。既然父親肯同你講o甘多野﹐表示佢有好多野想同人講﹐同埋想同自己女兒分享自己既想法﹐如果唔係真係太煩咪應酬下佢囉。當然你捉左佢去學呢樣果樣﹐你都可以打開話題﹐問下佢學成點﹐好唔好玩之類......

佢未必真係o甘八﹐但可能想珍惜同你通話既時間﹐所以猛搵話題呢﹖好似我同我老豆﹐一講電話就可以講 2-3 個鐘 (我都唔係同屋企人一齊住﹐仲要一個東岸一個西岸)﹐次次佢都係講下屋企點樣(裝修呀﹐有蜜蜂竇呀)﹐又或者試整左 D 咩新食譜﹐又或者講下呢個人果個人點點點.... 我咪奉陪到底一齊笑下囉。老人家 D 仔大女大個個飛走o西﹐有時真係好寂寞架。

有時我一個人係屋企﹐都好想有人同我傾下.....

再搭多句﹐香港人係見低踩見高又踩﹐只要大家有共通目標(例如近期o靚模)﹐就會唔執輸o甘一齊插﹐如果你扮o西野幫佢地講說話﹐又會用道德高低黎插埋你一份。

TOP

Littleprince